الثقافية
✍
♦️عاصي طَلَب منصور بدّو الياس! - عبد الغني طليس
يمكن آلْياس
لما نِسي حالو ونِسي صحابو
وقعَد وَحْدو..
كَسَر عن غير قصد الكاسْ
وصارت خيالات البشَر تمرق
كأنّا فوق مرتَبْةِ آلْحوَاس ْ
نَقّى عرش يقعد عليه مْنِ الضّجر
نَقّى ملَك ياخد محلّو
ويلبس تيابو
لأنو مسَاقبة..ذات القِياسْ!
...وبتقول غِنّيّة حزينة بْبيت إنطلياس ْ:
ألله أخَد عاصي ..
عاصي طلَب منصور...
منصور بدو آلْياسْ ..
والياس خايف مِن الموت ولعبتو
ورح ياكلو الوسواسْ..
...وبتقول غنيّة حزينة بْبيت إنطلياس ْ
رح يخلق مْن الناس ناسْ
ع الشِّعر والمسرح
وْبيقَلْب الموسيقى الطالعة
من بَرْمِة الأرض وْ صلاة السنديانة يوقفوا حرّاسْ ،
و الياسْ
خايف مِن خْيالو عَ طول
و..ناطر القِدّاسْ ،
كانت عم تْقلّو الدني
ما فيك تبقى أخضر ..وْلا سوسَني
جايي اليَبَاسْ...
وإنتَ الطفل
جايب معَك للعايزين كْيَاسْ
وْخَلْفك موسيقى والفَلَك حسّاسْ
وفي فوق هالقامة الرقيقة راسْ
لكنْ ما صدّق هالحَكي
وْضلّو يقلّو للزمان خْراسْ .
حاسس آلْياسْ
هلّق
بْنَوبة فزَع..نَوبة فرَح..نَوبة نْعاسْ
وْ جايي مَعُنْ نَومة غميقة عا إيدين الربّ مع رَنّة جراسْ .
...آعطيني يا خيّي الياس راسَك
راسك بْيِنباسْ...
في الياس رحباني - نزيه أبو شقرا
يا الياس مين القال إنت غفيْت؟
إسمك بِدايه ما إلو نهايي
ومين قال عا دروب النهايه مشيْت؟
لا لا إل متلك مَطلَب وغايي
باقي إنت معنا متل ماجيْت
ويَلّي إجا للفن تنقايه
ساعة رحيلو ما لِها توقيْت
وَيَا الياس لو بالروح عَنَّا قفيْت
بتتقَمَّص بأجيالنا الجايي
في الياس رحباني - قيصر مخائيل
لما الصمت يوجّع الألحان
بيكون الحلم سافر
و سيد الاحساس
غفي غفوتو عا حفافي العمر
غمض عيونو عا دروب حلوة
عا لحظات رسمت حلا لبنان
واليوم صارت عيون النغمات تنقط سكوت
و طرقات الاحلام تسرق لراسمها
عا أطول طريق
و عا سفرة حلم
ما بيعرف يفيق...
في الياس رحباني - نعمان الترس
بكره الدني بتخلص...
بيمشو الناس
وبتصير بردانة الشمس
هونيكبيطلع عَ بالا بالفضا يا الياس
كرمال تدفا...
تلبس غنانيك
في الياس الرحباني - قزحيا ساسين
الأَرْز... دمعَه واقفِه
عندَك سَمَا... بِالكاد حالا سايِعَا
نْ وِجْعِت شي مَرَّه... بَسّ وُسْعا بْيُوجَعا
عندَك سَمَا... ومش هيك قاسي كِنتْ
كل ما منِحضا بْحِلم بِتقِلّو : "تَعَا"
عندَك سَمَا... مش عَيب؟... ألله إنتْ
عم تاخُد من الأرض حَتَّا توَسِّعا
الياس الرحباني... خِلِص الحِلم التّالِت
نداء الوطن✍
